Hagnaður Comcast eykst um 30%

Hagnaður kapalsjónvarpsfélagsins Comcast jókst verulega milli ára, eða um þrjátíu prósent, og nam 1,87 milljörðum Bandaríkjadala, jafnvirði um 210 milljarða íslenskra króna, á fyrsta fjórðungi ársins. Hlutabréf félagsins hækkuðu um tæp tvö prósent í fyrstu viðskiptunum eftir að uppgjörið var birt í morgun.

Áskrifendum fjölgaði um 24 þúsund á fjórðunginum sem er mun meiri fjölgun en búist hafði verið við, eftir því sem fram kemur í frétt Wall Street Journal.

Þá jukust tekjur félagsins um fjórtan prósent, fóru úr 15,3 milljörðum Bandaríkjadala og í 17,4 milljarða. Greinendur reiknuðu með að tekjurnar myndu nema 17,04 milljörðum Bandaríkjadala á ársfjórðunginum.

Eins og greint hefur verið frá er Comcast að kaupa Time Warner Cable á um 45 milljarða Bandaríkjadala, sem jafngildir um 5.056 krónum. Er samningurinn með þeim stærstu í afþreyingageiranum á heimsvísu. Kaupin eru þó ekki frágengin en samkeppnisyfirvöld eiga enn eftir að leggja blessun sína yfir þau.

• Blogga um frétt