Lyfjarisarnir Novartis og GlaxoSmithKline tilkynntu í morgun um samkomulag um samvinnu og skipti á vörulínum, en heildarfjárhæð samningsins hleypur á milljörðum dala. Fyrirtækin munu meðal annars vinna sameiginlega á neytendamarkaði með mörg þekkt vörumerki. Þá mun GlaxoSmithKline selja Novartis krabbameinslyfjaframleiðslu sína meðan Novartis selur bóluefnaframleiðsluna til GlaxoSmithKline.
Þessi viðskipti koma á sama tíma og miklar vangaveltur eru um stóra samruna í greininni. Þannig hafa verið sögusagnir um að bandaríska lyfjafyrirtækið Pfizer sé að skoða 100 milljarða dala kaup á AstraZeneca og að Valeant Pharmaceuticals séu að skoða kaup á botox framleiðandanum Allergan fyrir 40 milljarða dali.
Verð hlutabréfa GlaxoSmithKline hækkuðu um 5% á markaði í morgun og Novartis um 2,75%. Þá fóru bréf AstraZeneca upp um 8% og gengi bréfa í breska lyfjafyrirtækinu Shire hækkuðu um 4,6%, en væntingar markaðarins um fleiri samruna virðast ýta flestum lyfjafyrirtækjum upp.