Fasteignafélagið Reginn, sem skráð er á hlutabréfamarkað, hefur á nokkuð skömmum tíma samið um kaup á þremur hótelum. Helgi S. Gunnarsson, forstjóri fyrirtækisins, segir aðspurður að Reginn hyggist ekki fara nú af fullum þunga í kaup á fasteignum undir hótel, heldur verði „aðrir valkostir skoðaðir ef þeir eru vel staðsettir“.
Reginn keypti fyrir tveimur vikum fasteignir sem hýsa Hótel Óðinsvé í miðbænum og veitingastaðinn Snaps. Síðastliðinn vetur leigði fyrirtækið Keahótelum fasteignina Austurstræti 16, sem alla jafna er kennd við gamla Reykjavíkurapótek. Um svipað leyti keypti það jafnframt fasteignina sem hýsir Hótel KEA á Akureyri.
Alla jafna sveiflast rekstur hótela eftir aðstæðum í efnahagslífinu. Helgi segir að Reginn fjárfesti einungis í hótelfasteignum sem taldar séu öruggar, líkt og Austurstræti 16 og Hótel Óðinsvé í miðbænum og Hótel Kea í miðbæ Akureyrar. Gangi rekstur hótelrekanda ekki vel, ætti með auðveldum hætti að vera hægt að fá annan í staðinn til að reka þar hótel. Áhættan sé því allt önnur en að leigja út fasteign undir hótel á einangruðum stað á landsbyggðinni, svo dæmi sé tekið, segir í umfjöllun um málið í viðskiptablaði Morgunblaðsins í dag.