Tómas Már Sigurðsson, sem hefur verið forstjóri Alcoa í Evrópu og Mið-Austurlöndunum, mun færast upp innan fyrirtækisins og taka við sem framkvæmdastjóri frumframleiðslu Alcoa á heimsvísu. Þetta er hluti af stærri uppstokkun á stjórnendateymi fyrirtækisins, en forveri Tómasar mun taka við sem aðstoðarforstjóri samsteypunnar.
Tómas gegndi áður starfi forstjóra Alcoa Fjarðaáls og Alcoa á Íslandi, en fluttist í ársbyrjun 2012 til Genfar til að stýra Alcoa í Evrópu.
Frumframleiðsla (GPP) er eitt af þremur framleiðslusviðum Alcoa en undir það svið falla báxítnámur, súrálsframleiðsla, orkuvinnsla og álver. Hin tvö sviðin eru valsaðar vörur í iðnaði bíla- og flugvélaframleiðslu (GRP) og tilbúnar vörur sem þróaðar hafa verið t.d. fyrir sérstaka notkun í flugvéla- og byggingariðnaði (EPS).
Tómas tekur við hinu nýja starfi af Roy Harvey, sem nýlega var skipaður aðstoðarforstjóri mannauðs-, öryggis-, heilsu- og umhverfismála ásamt yfirumsjón með sjálfbærnimálum Alcoa.
Daglegur rekstur álvera Alcoa, súrálsverksmiðja og báxítnáma um allan heim mun nú falla undir ábyrgðarsvið Tómasar. Hann verður staðsettur í New York og yfirmaður hans verður Bob Wilt, forstjóri frumframleiðslu Alcoa.
Jafnframt mun Tómas taka sæti í framkvæmdaráði Alcoa. Martin Briere mun taka yfir starfið sem Tómas gegndi í Evrópu en hann er forstjóri frumframleiðslu í Kanada og Afríku. Hann mun flytjast til Genfar og verður hér eftir forstjóri frumframleiðslu í Kanada, Evrópu og Afríku.
Breytingin hefur verið kynnt innan fyrirtækisins en enn á eftir að gefa út formlega tilkynningu um breytinguna.
Tómas hóf störf hjá Alcoa Fjarðaráli árið 2004, en var árið 2011 ráðinn sem forstjóri Alcoa í Evrópu með aðsetur í Genf. Hann hafði jafnframt yfirstjórn álframleiðslusviðs (e. Global Primary Products) Alcoa í álfunni.
Í tilkynningunni er sagt frá því að reynsla Tómasar muni nýtast vel við að bæta framleiðslu fyrirtækisins. Tómas lauk prófi frá Háskóla Íslands í verkfræði og fékk mastersgráðu í framkvæmdaáætlun frá Cornell háskólanum í Bandaríkjunum árið 1995.