Undirritaður hefur verið kaupsamningur milli Regins hf. og Landstólpa þróunarfélags ehf. um kaup Regins á öllu verslunar- og þjónusturými á reitum 1 og 2 við Austurbakka 2 (Hörpureitum). Alls er um að ræða um 8.000 fermetra útleigurými sem að megninu til er staðsett á 1. og 2. hæð bygginganna. Gera má ráð fyrir að jöfn skipting geti verið á milli verslunar- og þjónustustarfsemi í þessari einingu. Á reitunum er að auki fyrirhuguð uppbygging á íbúðarhúsnæði og skrifstofurými, sem er ekki hluti af þessum kaupsamningi.
Þetta kemur fram í tilkynningu frá Regin, en mbl.is greindi frá því að samningurinn væri í burðarliðnum í síðasta mánuði. Landstólpar þróunarfélag ehf., sem er eigandi lóðanna og mun byggja upp verkefnið, er í eigu Stólpa ehf. og Landey ehf. Landstólpar þróunarfélag ehf. er í meirihlutaeigu Stólpa ehf.
Að mati Regins er um að ræða mjög áhugavert svæði sem mun styrkja og efla miðbæ Reykjavíkur sem verslunar- og þjónustusvæði. Reginn áformar að tengja starfsemi, rekstur og markaðsstarf Smáralindar við þennan nýja miðbæjarkjarna í nánu samstarfi við núverandi og nýja rekstraraðila.
Sem lið í að styrkja verkefnið hefur Reginn ráðið alþjóðlega sérfræðiráðgjafa, við skipulag og hönnun verslunar- og þjónustukjarnans, til að vinna í nánu samstarfi við ráðgjafa og hönnuði seljanda. Þessir aðilar munu einnig koma að öflun nýrra leigutaka. Frekari kynning á hugmyndum og nálgun verkefnisins verður kynnt síðar.
Kaupverðið er trúnaðarmál á þessu stigi, en í umfangi er um að ræða 3,5% aukningu á eignasafni Regins, mælt í fermetrum, en fyrir á félagið um 220 þúsund fermetra af fasteignum, þar af eru um 90 þúsund fermetra verslunarhúsnæði. Gert er ráð fyrir að verkefnið taki um 3 ár.