Ætla að byggja raðhús í Neskaupstað

Nýverið var Byggingafélagið Nes ehf. stofnað í Neskaupstað. Stofnendur félagsins eru þrír talsins,   Samvinnufélag útgerðarmanna sem á 80% hlut og Byggingafélögin Nestak og Nípukollur sem eiga 10% hlut hvort. Tilgangur félagsins er fyrst og fremst að standa fyrir byggingu íbúðarhúsnæðis en húsnæðisskortur hefur verið viðvarandi í Neskaupstað að undanförnu og mikil þörf á nýju íbúðarhúsnæði. Hefur félagið að undanförnu haft samráð við bæjaryfirvöld hvað varðar byggingalóðir, segir í fréttatilkynningu.

Samkvæmt tilkynningunni hefur þegar verið tekin ákvörðun um fyrsta verkefni félagsins en það felst í byggingu fjögurra íbúða raðhúss við Sæbakka 25. Íbúðirnar verða 97 fermetrar að stærð auk  26 fermetra bílskúrs . Framkvæmdir við byggingu hússins munu hefjast síðar í sumar en gert er ráð fyrir að þeim ljúki á næsta ári. Fyrirhugað er að selja íbúðirnar á ýmsum byggingastigum, allt eftir óskum væntanlegra kaupenda. Þegar er farið að hyggja að áframhaldandi byggingaframkvæmdum á vegum félagsins, segir í tilkynningunni.

Stjórn þessa nýja félags skipa þeir Magnús Jóhannsson sem er  stjórnarformaður, Róbert Jörgensen og Sigurjón Kristinsson. Framkvæmdastjóri Byggingafélagsins Ness er Freysteinn Bjarnason

• Blogga um frétt