IFS greining spáir því að tekjur Marels á öðrum fjórðungi ársins verði 170 milljónir evra, sem jafngildir 26,4 milljörðum króna. Til samanburðar námu tekjur félagsins 178 milljónum evra á sama tímabili í fyrra. IFS gerir jafnframt ráð fyrir því að tekjur félagsins fyrir árið í heild verði 659 milljónir evra, eða 102,4 milljarðar króna.
IFS hefur gefið út afkomuspá sína fyrir annan ársfjórðung, en Marel mun birta uppgjör sitt á morgun. Samkvæmt spánni verður fimm milljóna EBIT (rekstrarhagnaður) á tímabilinu og 26 milljónir á öllu árinu.
IFS bendir þó á að vegna umtalsverðra breytinga sem standa yfir hjá félaginu sé nokkur óvissa í spánni. Gert er ráð fyrir að umbreytingakostnaður félagsins verði fjórtán milljónir evra á árinu.
Markmið Marels um aðlagaðan rekstrarhagnað, þar sem ekki er tekið tillit til umbreytingakostnaðar, á árinu er 55 milljónir evra, en IFS spáir því að hann verði um fjörutíu milljónir evra.