Háhælaðir Crocs-skór voru ekki góð hugmynd

Heimsins stærsti framleiðandi á plastklossum, Crocs, ætlar að loka eða breyta rekstri 75-100 búða sinna og hægja á opnun nýrra verslana næstu misserin. Þessi ákvörðun var tekin í kjölfar ársfjórðungsuppgjörs fyrirtækisins. Einnig verður um 180 starfsmönnum sagt upp, sem er um 4% af starfsmannafjölda fyrirtækisins. Þar af verður um 70 sagt upp í höfuðstöðvum Crocs í Colorado.

Crocs fór að framleiða of margar tegundir af skóm, opnaði of margar búðir og réð of margt starfsfólk, viðurkenndu stjórnendur fyrirtækisins er uppgjörið var kynnt í gær.

„Við þurfum að breyta hugmyndafræði okkar,“ sagði forstjóri fyrirtækisins, Andrew Rees.

Crocs hefur ákveðið að fækka skótegundum sem framleiddar verða undir vörumerkinu um allt að 40%. Fyrirtækið ætlar héðan í frá að einbeita sér aftur að vinsælustu Crocs-skónum, sandölum og klossum. Meðal tegunda sem hætt verður að framleiða eru háhælaðir skór og leðurstígvél. Forstjóri fyrirtækisins segir að of margir séu í samkeppni um sölu á slíkum skófatnaði.

Vinsældir Crocs-klossanna urðu mjög miklar fyrir nokkrum árum og mátti sjá þá á fótum fjölda fólks, barna jafnt sem eldri borgara.

Frétt Huffington Post um málið.

• Blogga um frétt