Efnahagsbrotadeild bresku lögreglunnar (SFO) hefur samið við fjárfestinn Robert Tchenguiz um bætur vegna óréttmætrar handtöku á honum þegar embættið skoðaði tengsl hans við Kaupþing banka. Bæturnar nema 1,5 milljónum punda, eða tæplega 300 milljónum króna. Fyrr í vikunni samdi embættið við bróður hans, Vincent Tchenguiz, um tæplega 600 milljóna bætur vegna sama máls.
Rannsókn SFO á bræðrunum og fjárfestingafélögum þeirra kom til vegna falls Kaupþings og tengsla þeirra við bankann. David Green, forstjóri SFO, hefur beðið bræðurna afsökunar á handtökunum og að sátt hafi náðst í málinu án kostnaðarsamra réttarhalda.
Árið 2012 tók dómstóll til baka húsleitarheimild sem SFO hafði verið veitt, en við skoðun málsins kom í ljós að SFO hafði ekki verið með neinar öruggar heimildir fyrir þeim ásökunum sem lágu að baki húsleitarbeiðninni.