Neitaði að gefa upplýsingar og var hótað

Fyrirtækið Yahoo greindi frá því í dag að stjórnvöld hefðu hótað þeim dagsektum er hljóða upp á 250 þúsund Bandaríkjadali þegar það neitaði að afhenda Þjóðaröryggisstofnun Bandaríkjanna (NSA) gögn um notendur sína.

BBC greinir frá þessu.

NSA krafðist gagnanna á grundvelli eftirlitsreglna sem uppljóstrarinn Edward Snowden svipti hulunni af á síðasta ári, en fyrirtækið hefur haldið því fram fyrir dómstólum að beiðnin stangaðist á við stjórnarskrá landsins. Þetta kemur fram í dómsskjölum málsins sem gerð voru opinber í dag að fyrirskipan dómara. Þar kemur fram að dómstólar höfnuðu rökum Yahoo. 

Lögmaður Yahoo að segir birtingu gagnanna vera mikilvæga í þágu gagnsæis en samkvæmt þeim hafa fyrirtæki verið að berjast gegn beiðnum stjórnvalda í mörg ár og hófu að gera það löngu áður en Snowden steig fram. Þá sagði lögmaður Yahoo einnig að bandaríska ríkið hefði hótað dagsektunum ef fyrirtækið yrði ekki við beiðninni.

• Blogga um frétt