Viðskipti | mbl | 12.9.2014 | 13:13

Verður Facebook eins og Snapchat?

Það gæti komið sér vel að setja inn tímabundar stöðuuppfærslur. Rósa Braga

Viðmót Facebook gæti verið að færast í átt að Snapchat þar sem þar sem verið er að skoða möguleikann á tímabundnum stöðuuppfærslum.

Talsmaður Facebook sagði í samtali við CNN að verið væri að prófa möguleikann og einungis hluti notenda sem væru með Facebook smáforritið í Apple síma hefðu fengið að njóta.

Skjáskot af þessu hafa birst á Twitter en þar má sjá að hægt er að velja að stöðuuppfærslan standi allt frá einni klukkustund upp í eina viku.

Snapchat hefur notið gríðarlegra vinsælda á liðnum árum og benda kannanir til þess að forritið sé sífellt að saxa á forskot Facebook. Samkvæmt könnun sem gerð var í nóvember 2013 notuðu 12,1% fólks á aldrinum 18 til 34 ára Snapchat forritið á hverjum degi en í júní á þessu ári var hlutfallið komið upp í 32,9%.