Metfjöldi pantar iPhone í forsölu

Meteftirspurn er eftir nýju iPhone-símunum og aldrei hafa fleiri forpantanir borist að sögn Apple. Þeir sem langar í iPhone 6 með stærri skjá gætu þurft að bíða töluvert en kaupendur hans fengu skilaboð um helgina um að afhending gæti tekið allt að þrjár til fjórar vikur.

Apple sagði í tilkynningu í dag að innan 24 klukkustunda frá því að sala hófst á símunum á föstudaginn hefðu yfir fjórar milljónir forpantana borist. Fyrstu viðskiptavinirnir fá símann í hendurnar á föstudaginn en aðrir síðar í mánuðinum. Þá verða einhverjir að bíða fram í október þar sem fleiri forpantanir bárust en upphaflega var áætlað.

Af tilkynningunni má ráða að færri munu fá en vilja þegar síminn kemur í sölu í verslunum á föstudaginn en raðir eru þegar teknar að myndast fyrir utan búðirnar. Klukkan átta um morguninn að staðartíma verða dyrnar opnaðar á búðunum í Bandaríkjunum, Ástralíu, Kanada, Frakklandi, Þýskalandi, Hong Kong, Japan, Púertó Ríkó, Singapúr og Bretlandi. Aðrar þjóðir þurfa hins vegar að bíða fram til 26. september.

• Blogga um frétt