Vilja nýyrði fyrir „takeaway“

Vefsíðan aha.is hefur ákveðið að efna til nýyrðasamkeppni þar sem forsvarsmönnum hennar þykir ekkert nothæft íslenskt orð yfir það sem kallað er „takeaway“ á ensku. Efnt er til keppninnar af því tilefni að tekin hefur verið upp veitingaþjónusta á vefnum.

Notendum síðunnar gefst kostur á að velja af matseðlum um þrjátíu veitingastaða, sækja svo matinn eða fá sendan heim gegn gjaldi. Þegar viðskiptavinurinn hefur pantað af matseðli, á vefsíðu eða úr appi aha.is, birtist pöntunin á skjá hjá veitingahúsinu og ráðstafanir eru þegar gerðar til að útvega flutning á matnum, sé heimsendingar óskað.

Greiðsla fyrir matinn fer fram í appinu eða á vefsíðunni með debit eða kreditkorti þannig að greiðsla er frágengin við pöntun.

„Sem fyrr segir hefur mjög færst í vöxt að fólk panti sér mat af veitingastöðum til neyslu heima. Ekkert nothæft íslenskt orð er til yfir það sem kallað er takeaway á ensku. Í tilefni af opnun veitingaþjónustunnar efnir aha.is nú til nýyrðasamkeppni um íslenskt orð í staðinn fyrir ensku slettuna takeaway. Í verðlaun er úttekt að upphæð 50.000 kr. á veitingavef aha.is og iPhone 6,“ segir í tilkynningu.

• 1 blogg um fréttina

Bloggað um fréttina

• Júlíus Már Baldursson: Endar í einhverju hallærislegu