Mælir með flötum 21% vaski

Ríkisstjórnin ætti að hækka neðra virðisaukaskattþrepið í 14% að mati Alþjóðagjaldeyrissjóðsins (AGS) en það er í dag í 7%. Þá ætti að lækka efra skattþrepið eins mikið og staða ríkissjóðs gefur tilefni til. Til lengri tíma ætti að stefna að einu skattþrepi og mælir sjóðurinn með 21% flötum virðisaukaskatti.

Þetta kemur fram í skýrslu AGS um íslenska virðisaukaskattkerfið sem ber heitið „Modernizing the Icelandic VAT“ og unnin var að beiðni íslenskra stjórnvalda. Skýrslan var birt í gær. AGS tekur fram að þær aðgerðir sem ríkisstjórnin hafi þegar kynnt til sögunnar séu í góðu samræmi við fyrri ráðleggingar sjóðsins. AGS ítrekar það álit sitt að afleggja ætti allar undanþágur innan kerfisins. Í það minnsta í ferðaþjónustu, samgöngumálum, íþróttamálum og menningarmálum. 

Því til viðbótar telur AGS rétt að undanþága frá skráningarskyldu á virðisaukaskattskrá vegna aðila með óverulegan rekstur verði miðuð við 2 milljónir króna en miðað er við eina milljón ein og staðan er í dag. Fram kemur í skýrslunni að hærra viðmið minnki álag á stjórnsýsluna og starfsmenn Ríkisskattstjóra geti þá lagt áherslu á stærri aðila sem skili meiri skatttekjum.

Ennfremur telur AGS að stjórnvöld ættu að skattleggja að fullu sölu og leigu á atvinnuhúsnæði og fyrstu sölu á íbúðarhúsnæði. Sömuleiðis að sérstakar endurgreiðslur vegna hópferðabifreiða, skipa og flugvéla í innanlandssamgöngum verði felldar úr gildi sem og endurgreiðslur á vörugjöldum vegna innflutning á bílaleigubílum.

Þá mælir AGS með því að almenn vörugjöld verði afnumin af byggingarefni, heimilistækjum og raftækjum. Verði vörugjöld á sykraðar vörur ekki felld niður telur sjóðurinn rétt að tryggja að álagning þeirra stuðli raunverulega að minni neyslu á sykri. Hinn möguleikinn sé að vörugjöldin verði afnumin og hæsta virðisaukaskattþrepið látið ná til slíkra vara.

• 2 blogg um fréttina

Bloggað um fréttina

• Kolbrún Hilmars: Sammála AGS - nema um tvennt:
• Júlíus Már Baldursson: Enn stjórnar AGS