19 ára og næstríkust í Noregi

Kaupsýslumaðurinn Kjell Inge Røkke er sá ríkasti í Noregi en eignir hans jukust um þrjá milljarða norskra króna á síðasta ári og eru nú metnar á 11,8 milljarða norskra króna, sem svarar til um það bil 134 milljarða íslenskra króna. Það er 19 ára gömul stúlka sem er í öðru sæti listans yfir ríkustu Norðmennina.

Katharina Gamlemshaug Andresen, dóttir Johans H. Andresens, er í fyrsta skipti á lista yfir hæstu skattgreiðendur í Noregi en það skýrist af því að ekki eru skráðir á þann lista þeir auðkýfingar sem eru yngri en átján ára. Hún er nítján ára og er í öðru sæti listans með eignir upp á 4,6 milljarða norskra króna.

Fyrir sjö árum færði faðir hennar, Johan Andresen, sem hagnaðist mest á tóbaksframleiðslu, yfir 80% af eignum sínum í fjárfestingarfélaginu Ferd Holding á dætur sínar, þær Katharinu og Alexöndru. Andresen er sjálfur í níunda sæti listans með eignir upp á 2,63 milljarða norskra króna.

Í fyrra var Olav Thon í efsta sæti listans yfir ríkustu Norðmennina en í ár er hann kominn niður í 26. sæti. Það skýrist af því að Thon, sem hefur einkum hagnast á fasteignamarkaði og byggingarframkvæmdum, færði stóran hlut af eignum sínum í sérstakan sjóð og eru eignirnar því ekki lengur í hans nafni.

Samkvæmt frétt Aftenposten er það síðan fjölmiðlafælinn fjárfestir, Einar Aas, sem var með mestar tekjur á síðasta ári eða 313 milljónir norskra króna sem svarar til 5,7 milljarða íslenskra króna.

• Blogga um frétt