Íslenskt vatn til sölu í Taívan

Icelandic Water Holdings hf, framleiðendur Icelandic Glacial-vatnsins, og dreifingarfyrirtækið Shiang Yang Trade Co. Ltd frá Taívan hafa gert með sér samning um dreifingu á Icelandic Glacial í Taívan.

„Okkur er mikil ánægja að tilkynna að Shiang Yang Trade Co. Ltd er nýr dreifingaraðili okkar í Taiwan“ er haft eftir Jóni Ólafssyni, stjórnarformanni og stofnanda Icelandic Water Holdings hf, í fréttatilkynningu. Fyrirtækið hefur að sögn Jóns áratuga reynslu í sölu drykkjavara frá Evrópu og býr yfir öflugu dreifikerfi í Taívan. „Við höfum trú á samstarfinu og vonum að það eigi eftir að efla hag beggja. Við erum stolt að geta boðið upp á Icelandic Glacial í þessu fallega landi.“

Icelandic Glacial-vatninu er tappað á flöskur úr lind fyrirtækisins í landi Hlíðarenda í Ölfusi og þaðan dreift víða um heim.

Icelandic Glacial, er selt á 19 mörkuðum víða um heiminn. Auk Taiwan er Icelandic Glacial til sölu í Bandaríkjunum, Kanada, Bretlandi, Frakklandi, Hollandi, Belgíu, Lúxemborg, Rússlandi, Hvíta-Rússlandi, Kalíníngrad, Úkraínu, Kína, Taílandi, Suður-Kóreu, Singapore, Macau, Perú og á Íslandi.

Jafnframt notar franska snyrti- og tískuvörufyrirtækið Christian Dior vatnið við framleiðslu á kreminu Dior Snow. Fyrirtækið var stofnað árið 2004 og eru Jón Ólafsson og Kristján Ólafsson stærstu hluthafar Icelandic Water Holdings ásamt bandaríska drykkjavöruframleiðandanum Anheuser Busch.

• Blogga um frétt