Félagið SNV Holding í eigu hjónanna Svanhildar Nönnu Vigfúsdóttur og Guðmundar Arnar Þórðarsonar, sem hélt utan um 35% hlut í Skeljungi, hagnaðist um nærri 2,5 milljarða króna við sölu á olíufélaginu í árslok 2013. Morgunblaðið hefur áður greint frá því að kaupverð alls hlutafjár Skeljungs, ásamt færeyska olíufélaginu Magn P/F sem var einnig í eigu hjónanna, hafi numið um átta milljörðum króna.
Svanhildur vildi ekkert tjá sig um ágóðann þegar eftir því var leitað.
Á síðasta ári nam bókfærður hagnaður SNV Holding 2,44 milljörðum og var eigið fé ríflega þrír milljarðar króna í árslok. Hagnaður félagsins á árinu 2013 skýrist að langstærstum hluta vegna sölunnar á Skeljungi, en fram kemur í ársreikningi SNV Holding að söluhagnaður hlutabréfa hafi verið 2,4 milljarðar. Einu skuldir félagsins eru eigendalán að fjárhæð 290 milljónir.
Ljóst er að hjónin hafa hagnast gríðarlega á viðskiptunum með Skeljung en þau eignuðust meirihluta í félaginu þegar þau keyptu, ásamt Birgi Þór Bieltvedt, 51% hlut af Glitni í gegnum Skel Investment. Síðar eignuðust þau olíufélagið að fullu þegar Íslandsbanki seldi 49% hlut í Skeljungi til SNV Holding árið 2010. Í viðtali við ViðskiptaMoggann 29. maí sl. upplýsti Svanhildur að þau hefðu keypt þann hlut, sem þau áttu forkaupsrétt á, fyrir á fjórða hundrað milljónir. Árið 2011 seldi Birgir allt hlutafé sitt til hjónanna.
Svanhildur og Guðmundur eiga jafnframt allt hlutafé í eignarhaldsfélaginu Hedda sem fór með ríflega fjórðungshlut í Skeljungi auk þess að eiga 66% hlut í færeyska félaginu Magn P/F. Fram hefur komið í Morgunblaðinu að á hluthafafundi félagsins hinn 22. janúar á þessu ári, skömmu eftir að Skeljungssalan kláraðist, hafi verið ákveðið að lækka hlutafé með greiðslu til eigenda að fjárhæð 2,6 milljarðar króna. Lítill vafi leikur á þvi að í kjölfar sölunnar eru Svanhildur og Guðmundur nú á meðal allra efnuðustu hjóna landsins.