Viðskipti | mbl | 18.11.2014 | 17:06

Eignir Arion nema 942 milljörðum króna

Arion banki. mbl.is/Kristinn

Hagnaður Arion banka á fyrstu níu mánuðum ársins 2014 nam 22,6 milljörðum króna eftir skatta samanborið við 10,1 milljarð króna á sama tímabili 2013. Arðsemi eigin fjár var 19,9% samanborið við 10,0% á sama tímabili árið 2013 og heildareignir námu 942,2 milljörðum króna samanborið við 938,9 milljarða króna í árslok 2013.

Þetta kemur fram í ársfjórðungsuppgjöri félagsins sem birt var í dag.

Eiginfjárhlutfall bankans í lok tímabilsins var 24,6% en var 23,6% í árslok 2013. Hagnaður eftir skatta nam 22,6 mö.kr. samanborið við 10,1 ma.kr. á sama tímabili 2013. Hagnaður á þriðja ársfjórðungi nam 5,2 mö.kr. samanborið við 4,2 ma.kr. á þriðja ársfjórðungi 2013.

6,5 milljarðar í tekju- og bankaskatta

Rekstrartekjur hækka á milli ára og námu 38,3 mö.kr. samanborið við 31,6 ma.kr. á sama tímabili árið 2013. Mesta hækkunin er í hreinum fjármunatekjum. Hreinar vaxtatekjur námu 18,3 mö.kr. og eru óbreyttar frá sama tímabili 2013. Hreinar þóknanatekjur námu 10,1 ma.kr. samanborið við 8,3 ma.kr. á sama tímabili 2013. Aukningin er einkum tilkomin vegna hærri þóknanatekna af greiðslukortum og af starfsemi fjárfestingarbankasviðs.

Tekju- og bankaskattar námu samtals 6,5 mö.kr. samanborið við 3,1 ma.kr. á sama tímabili 2013. Hagnaður af aflagðri starfsemi nam 6,6 mö.kr. samanborið við 3 m.kr. tap á sama tíma 2013. Hagnaðurinn er nær eingöngu tilkominn vegna sölu á 18,8% eignarhlut bankans í HB Granda hf. á öðrum ársfjórðungi 2014. Rekstrarkostnaður nam 18,6 mö.kr. samanborið við 18,2 ma.kr. á sama tímabili 2013.

Hrein virðisbreyting er jákvæð á tímabilinu og nemur 2,9 mö.kr. samanborið við 119 m.kr. gjaldfærslu á sama tímabili 2013. Virðisaukning útlána til fyrirtækja nemur 2,2 mö.kr. á fyrstu níu mánuðum ársins. Þá nemur hrein virðisrýrnun útlána til einstaklinga 0,2 mö.kr. á sama tímabili. Virðisaukning annarra eigna nemur 0,7 mö.kr. á tímabilinu.

Arðsemi eigin fjár var 19,9% en var 10,0% á sama tímabili 2013. Vaxtamunur af meðalstöðu vaxtaberandi eigna var 2,9% eða óbreyttur frá sama tímabili árið 2013. Kostnaðarhlutfall var 48,7% en var 57,6% á sama tímabili 2013 og kemur einkum til af hærri rekstrartekjum. Heildareignir námu 942,2 mö.kr., samanborið við 938,9 ma.kr. í árslok 2013. Eigið fé bankans var 159,8 ma.kr. en nam 144,9 mö.kr. í lok árs 2013. Bankinn greiddi arð til hluthafa sinna á öðrum ársfjórðungi upp á 7,8 ma.kr. Eiginfjárhlutfall nam 24,6% í lok tímabilsins samanborið við 23,6% í árslok 2013.

Sterkt uppgjör

„Afkoma bankans fyrstu níu mánuði ársins er góð. Þetta er sterkt uppgjör og er arðsemi bankans á tímabilinu rétt um 20%. Vissulega er það svo að óreglulegir liðir hafa jákvæð áhrif á uppgjörið og vegur þar þyngst sala bankans á hlut í HB Granda og skráning félagsins á markað í apríl,“ er haft eftir Höskuldi H. Ólafssyni, bankastjóra, í tilkynningu.

„Við erum ánægð að sjá áframhaldandi stöðugleika í grunnrekstri bankans og eru allar tekjuskapandi einingar bankans að skila ágætri afkomu. Ég er sérstaklega ánægður með þann árangur sem hefur náðst á sviði þóknanatekna sem vaxa um 22% á milli ára og færast nær okkar markmiðum. Horft fram á veg eru þó áfram áskoranir á kostnaðarhliðinni,“ segir Höskuldur.

Hann segir eiginfjárhlutfall banks vera áfram sterkt sem teljist afar mikilvægt því enn séu óvissuþættir í starfsumhverfinu. „Við náum árangri í að lækka hlutfall vandræðalána og sjáum fram á enn frekari lækkun á árinu. Víða erlendis er hlutfall vandræðalána að hækka en þróunin hér á landi á undanförnum árum hefur verið jákvæð og helst í hendur við lækkandi skuldsetningu heimila og fyrirtækja, en skuldsetning fyrirtækja sem hlutfall af vergri landsframleiðslu hefur ekki verið lægri síðan síðla árs 2004,“ segir Höskuldur.