Fullvinna hrálýsi úr loðnu, síld og makríl til manneldis

Þróunarfyrirtækið Margildi ehf. og þekkingarfyrirtækið Mannvit hf. hafa gert samstarfssamning í tengslum við undirbúning byggingar nýrrar verksmiðju til framleiðslu á gæðalýsi úr uppsjávarfiski. Nýja verksmiðjan mun fullvinna hrálýsi úr loðnu, síld og makríl til manneldis.

Fram kemur í tilkynningu, að fram til þessa hafi hrálýsi og fiskimjöl úr fyrrnefndum fisktegundum verið unnið sem hráefni til fóðurgerðar fyrir dýraeldi svo sem lax- og silungaeldi.

„Margildi hefur um nokkurt skeið unnið að þróun nýrrar vinnslutækni og markaða fyrir hrálýsið til manneldis og er meðal annars í samstarfi við Háskólann á Akureyri og Matís um það. Með fullvinnslu á hrálýsinu til manneldis skapast gríðarleg tækifæri til aukinnar verðmæta- og þekkingarsköpunar í sjávarútvegi,“ segir í tilkynningu.

Mun skapa um 70 störf

Þá kemur fram, að afkastageta fyrsta áfanga verksmiðjunnar verði um 10.000 tonn á ári og áætluð aukning útflutningsverðmætis lýsis fyrrnefndra fisktegunda allt að 3-4 milljarðar á ári.

„Gert er ráð fyrir að byggingu fyrsta áfanga verksmiðjunnar ljúki á fyrri hluta árs 2016 og annars áfanga tveimur árum síðar. Með öðrum áfanga verksmiðjunnar er ráðgert að tvöfalda afkastagetuna og möguleikar eru á enn frekari stækkun þegar fram líða stundir. Þannig munu skapast amk. 70 ný störf á sviði framleiðslu, rannsókna og þróunar.

Verksmiðjan kemur til með að skapa góðan grunn til frekari nýsköpunar á þessu sviði með rannsóknum, þróun og framleiðslu sérhæfðra omega-3 afurða úr lýsinu. Þær afurðir munu t.d. nýtast sem hráefni til matvælavinnslu omega-3 bættra matvæla svo sem markfæðis og barnamatar sem njóta sívaxandi vinsælda í Evrópu, Asíu og N-Ameríku,“ segir ennfremur.

• Blogga um frétt