Friðrik úr Harvard í Rétt

Friðrik Ársælsson hefur hafið störf hjá lögmannsstofunni Rétti – Aðalsteinsson & Partners ehf., en hann útskrifaðist með LLM gráðu frá Harvard Law School í vor. Friðrik lauk embættisprófi í lögfræði frá Háskóla Íslands árið 2009 og öðlaðist málflutningsréttindi fyrir héraðsdómi ári seinna. Hann starfaði hjá embætti sérstaks saksóknara árin 2011-2013 og hjá LOGOS frá 2008 til 2010.

Í fréttatilkynningu kemur fram að Friðrik stundaði nám við Harvard Law School sem Fulbright og Frank Boas styrkþegi með áherslu á félagarétt, fjármögnun og stjórnarhætti hlutafélaga. Þá er Friðrik stundakennari við Háskóla Íslands og kennir meðal annars í námskeiðunum opinbert markaðseftirlit, og félagaréttur og fjármálamarkaðir á meistarastigi. Friðrik er meðhöfundur bókarinnar Opinbert markaðseftirlit,, sem kom út hjá CODEX bókaútgáfu árið 2012.

Helstu starfs­svið Friðriks eru fjármuna- og fyrirtækjaréttur, gjaldþrotaréttur, skaðabóta­rétt­ur og stjórn­sýslu­rétt­ur auk málflutnings og verj­enda­starfa.

Hjá Rétti starfa nú níu lög­menn og eru eig­end­ur fjórir, þar af tveir með mál­flutn­ings­rétt­indi fyr­ir Hæsta­rétti en stofan var stofnuð af Sigríði Rut Júlíusdóttur og Ragnari Aðalsteinssyni.

• Blogga um frétt