Tónlistarforritið Beats verður í öllum iPhone-símum frá og með næsta ári en Apple stefnir á að appið verði hluti af næstu uppfærslu iOS-stýrikerfisins fyrir iPhone og iPad.
Þetta kemur fram í umfjöllun Financial Times. Apple keypti Beats-fyrirtækið í maí á þessu ári fyrir rúma þrjá milljarða Bandaríkjadala en fyrirtækið er þekktast fyrir framleiðslu á heyrnartólum.
Forsvarsmenn Apple vildu þó ekki tjá sig um málið þegar blaðamenn Financial Times leituðu eftir því en tímaritið var einnig fyrst til að greina frá kaupum Apple á Beats fyrr á árinu.
Talið er að þetta skref á hjá Apple gæti ógnað markaðsráðandi hlutdeild Spotify-tónlistarveitunnar en með því að koma appinu sjálfkrafa inn hjá öllum iPhone-eigendum er auðvelt að ná til notenda.
Tónlistarveitur á borð við Beats og Spotify hafa þó legið undir gagnrýni að undanförnu eftir að söngkonan Taylor Swift fjarlægði tónlist sína af þeirri síðarnefndu. Sagði hún veituna greiða of lítið fyrir tónlistina og draga verulega úr plötusölu.