Opnað verið fyrir umsóknir í frumkvöðlakeppnina Gulleggið 2015 á morgun föstudaginn 21. nóvember og er það liður í Alþjóðlegu athafnavikunni sem Klak Innovit hefur umsjón með á Íslandi.
Keppnin, sem var fyrst haldin árið 2008, hefur alið af sér fjölda sprotafyrirtækja sem sum hver eru orðin að stórum og þekktum fyrirtækjum hér á Íslandi. Í fyrra var metþátttaka, en þá komu inn 377 hugmyndir en alls hafa 1.703 hugmyndir borist í keppnina frá upphafi. Dæmi um þátttakendur síðustu ára eru Clara, Meniga, Pink Iceland, Remake Electric, Nude magazine, Videntifier, Róró, Silverberg, Gracipe og mörg fleiri.
Meginmarkmið keppninnar er að skapa vettvang fyrir ungt athafnafólk til að öðlast þjálfun og reynslu í mótun nýrra viðskiptahugmynda og rekstri fyrirtækja. Þannig er keppnin orðin gæðastimpill á viðskiptahugmyndir og fyrir frumkvöðla sem munu á næstu árum laða að enn fleiri fjárfesta, skapa ný störf og verðmæti fyrir íslenskt samfélag.
Gulleggið er gott tækifæri fyrir frumkvöðla til að koma hugmyndum sínum á framfæri og gera úr þeim raunverulegar og markvissar áætlanir sem miða að stofnun fyrirtækja. Samhliða keppninni er þátttakendum í samstarfsháskólum Klak Innovit boðið upp á námskeið, ráðgjöf og aðstoð sérfræðinga. Frá mótun hugmyndar til áætlanagerðar og þjálfunar í samskiptum við fjárfesta. Keppnin er opin fyrir alla, með og án hugmyndar. Frekari upplýsingar um keppnina má finna á heimasíðu keppninnar.