Landsbankinn selur hlut sinn í Borgun

Landsbankinn undirritaði í dag samning um sölu á 31,2% eignarhlut sínum í Borgun hf. Söluverð er 2.184 milljónir króna og stendur breiður hópur fjárfesta ásamt félagi á vegum stjórnenda Borgunar að kaupunum að því er segir í fréttatilkynningu.

„Borgun er leiðandi fyrirtæki í þróun og hagnýtingu lausna á sviði rafrænnar greiðslumiðlunar, en þessar breytingar hafa engin áhrif á viðskiptavini Borgunar eða rekstur félagsins. Kaupsamningurinn er gerður með fyrirvara um samþykki eftirlitsaðila, í samræmi við lög,“ segir ennfremur.

Haft er eftir Steinþóri Pálssyni, bankastjóra Landsbankans, að undanfarin ár hafi Landsbankinn verið áhrifalaus minnihlutaeigandi í Borgun en Íslandsbanki átt meirihluta hlutafjár. Miklar takmarkanir séu á aðkomu Landsbankans sem hluthafa að starfsemi borgunar í samræmi við sátt sem gerð hafi verið við Samkeppniseftirlitið árið 2008.

„Ennfremur hefur það verið markmið samkeppnisyfirvalda að aðeins einn banki sé hluthafi í hverju greiðslukortafyrirtæki á hverjum tíma. Þessi staða var óviðunandi fyrir Landsbankann og því teljum við þetta vera farsæla úrlausn fyrir bankann, félagið og nýja eigendur.“

• 1 blogg um fréttina

Bloggað um fréttina

• sleggjuhvellur: Landsbankinn gerir rétt