2.574 heimili í vanskilum

Heildarútlán Íbúðalánasjóðs í nóvember 2014 námu 639 milljónum króna, en þar af voru
almenn lán um 339 milljónum. Til samanburðar námu almenn útlán í nóvember 2013 946
milljónum króna. Meðalfjárhæð almennra lána var 10 milljónir króna.

Hlutfall undirliggjandi lánavirðis einstaklinga í vanskilum lækkaði í mánuðinum. Í lok nóvember nam fjárhæð vanskila útlána til einstaklinga 4,4 milljörðum króna og var
undirliggjandi lánavirði tæpur 51 milljarður króna eða um 8,26% útlána sjóðsins til
einstaklinga, samanborið við 10,61% í nóvember 2013.

Vanskil ná til 10,03% lánasafnsins

Heimili í vanskilum eru 2.574 og þar af eru 118 heimili með frystingu á lánum sínum. Alls voru 5,49% þeirra heimila sem eru með fasteignalán sín hjá Íbúðalánasjóði með lánin í vanskilum í lok nóvember 2014, sambærilegt hlutfall í lok nóvember 2013 var 7,32%. Fjárhæð vanskila útlána til lögaðila nam alls 3,6 milljörðum króna og nam undirliggjandi lánavirði 25,9 milljörðum króna. Tengjast því vanskil 17,38% lánafjárhæðar sjóðsins til lögaðila. Vanskil eða frystingar ná samtals til 10,03% lánasafnsins, en sambærilegt hlutfall í nóvember 2013 var 12,86%.

966 eignir seldar

Í lok nóvember átti Íbúðalánasjóður 1.965 fullnustueign og hefur þeim fækkað um 19 eignir frá því mánuðunum þar á undan. Í nóvember seldi sjóðurinn 45 eignir og 26 nýjar fullnustueignir bættust við eignasafnið í mánuðinum. Hafa þá 356 fullnustueignir bæst í eignasafnið frá síðustu áramótum.

Það sem af er ári hefur Íbúðalánasjóður selt 966 eignir en á sama tímabili 2013 seldi sjóðurinn 270 eignir. Þá er að auki búið að samþykkja kauptilboð í 101 eignir til viðbótar og vinna nú tilboðshafar að fjármögnun þeirra

Vanskil einstaklinga nema 4,4 milljörðum króna. mbl.is/Þorvaldur Örn Kristmundsson

• Blogga um frétt