Kviðdómur í Kaliforníu í Bandaríkjunum hefur sýknað tæknifyrirtækið Apple af ásökunum um samkeppnislagabrot.
Málið, sem hefur verið rekið fyrir dómstólum í nokkur ár, snerist um uppfærslu sem kom út árið 2006 yfir iTunes-hugbúnað Apple. Uppfærslan leiddi til þess aðeins iPod-spilarar gátu leikið tónlist sem var keypt í iTunes-versluninni. Þetta kemur fram á vef BBC.
Neytendur héldu því fram að með þessu hefði Apple brotið bandarísk samkeppnislög og kröfðust 350 milljóna dala í skaðabætur, sem samsvarar um 43 milljörðum króna.
Við réttarhöldin voru birtir tölvupóstar sem Steve Jobs, stofnandi Apple, sendi áður en hann lést árið 2012.
Um átta milljónir iPod-eigenda og 500 endursöluaðilar voru hluti af hópmálssókninni. Hefði Apple tapað dómsmálinu þá hefði Apple þurft að greiða um einn milljarð dala í skaðabætur (um 123 milljarða króna), því samkvæmt bandarískum lögum þrefaldast skaðabótaupphæðin sjálfvirkt við dómsuppkvaðninu.