Fall norsku krónunnar í gær kom flestum mikið á óvart. Erna Solberg, forsætisráðherra landsins, segir Norðmenn nú á leið inn í meiri óvissu en áður.
Ástæða falls krónunnar er talin vera lækkandi heimsmarkaðsverð á olíu á undanförnum mánuðum. Frá því að olíuverðið náði hámarki í júní, hefur lækkunin verið stöðug og ákvörðun OPEC-ríkjanna að minnka ekki framleiðslu sína hefur bætt gráu ofan á svart fyrir Vesturlönd í olíuframleiðslu. Er nú olíuverðið komið undir 60 dollara á tunnuna, og ófyrirséð er hvort verðið muni áfram lækka.
„Snögg lækkun olíuverðs leiðir til þess að við þurfum að einbeita okkur að innri þróun hagkerfisins,“ sagði Solberg í ræðu sinni í dag. Ríkisstjórn Noregs hefur gefið það út að hún leggi áherslu á bættum markaðsaðstæðum fyrir annan iðnað en olíuiðnaðinn, til þess að sveiflur í olíuverði hafi minni áhrif á efnahag og atvinnustig í landinu. Hagstofa Noregs (SSB) hefur spáð minni fjárfestingu í olíuiðnaði í landinu á komandi árum. Ekki hefur það þó áhrif á öll fyrirtæki í olíuiðnaði, en ýmis fyrirtæki í landinu þjónusta einnig erlend fyrirtæki og hafa þau minni áhyggjur af lækkandi olíuverði enda geta þau sinnt verkefnum í öðrum löndum.
„Við erum komin á þann stað að við verðum að taka afleiðingunum af minnkandi fjárfestingu í olíu og jarðgasi,“ bætti Solberg við.
Hagfræðingar norska bankans Nordea segja lækkun krónuverðsins í gær vera einstakan atburð. Sumir halda því fram að lækkunin hafi verið uppsöfnuð lækkun vegna lækkandi olíuverðs. Krónuverðið hefur haldist stöðugt frá því að olíuverð tók að lækka í júní, en í gær kom skellurinn. Fall krónunnar leiddi einnig til þess að Seðlabanki Noregs lækkaði stýrivexti í fyrsta skiptið frá árinu 2012.
Siv Jensen, fjármálaráðherra Noregs segir ríkið vel í stakk búið til þess að takast á við erfiðleika á olíumarkaði. „Við erum með lítið atvinnuleysi, mikinn hagvöxt og fyrirtæki skila hagnaði. Við erum vel í stakk búin til þess að takast á við breytingar í innlendum iðnaði þegar þar að kemur,“ sagði hún í óundirbúnum fyrirspurnartíma á norska þinginu í dag þegar hún var spurð út í viðbrögð ríkisstjórnarinnar við lækkun krónunnar.
Sjá frétt mbl.is: Morgan Stanley: Olíuverð mun lækka
Sjá frétt mbl.is: Olíuverð lækkar og lækkar