Viðskipti | mbl | 23.12.2014 | 11:02

Vildu ekki vinna á aðfangadagskvöld

Talið er að um 50 til 60 þúsund ferðamenn verði á Íslandi í desember. mbl.is/Golli

Opið er á sautján veitingastöðum í Reykjavík á aðfangadagskvöld og ekki er annað hægt að segja en að matseðlarnir séu fjölbreyttir. Geta prúðbúnir gestir á aðfangadag fengið sér allt frá kebab að hreindýrapaté í kvöldmat. Reykjavík er að stimpla sig inn sem jólaborg að sögn Samtaka ferðaþjónustunnar.

Nánast er uppbókað á Skrúð á Hótel Sögu þar sem hægt er að taka við hundrað manns í sæti. Eiga 96 manns þegar pantað borð og eru flestir matargestir erlendir ferðamenn þó tvö borð séu í nafni Íslendinga. Hörður Sigurjónsson, gæða- og sölustjóri á Hótel Sögu, segir matseðilinn fjölbreyttan þar sem gestirnir séu það einnig. Á borðstólnum verður meðal annars kalkúnabringa, hangikjöt, lambalæri og grænmetisréttur.

Ali baba í jólamatinn

Á MAR veitingastað á Geirsgötu er einnig að verða fullbókað en tekið er við 116 manns í sæti. Húsið opnar klukkan 17:30 og er síðasta borðið bókað klukkan 22. Dyrnar á Hereford hafa ávallt staðið opnar á aðfangadagskvöld en svo verður ekki á þessu ári. Samkvæmt upplýsingum frá veitingastaðnum var starfsfólkið afar ósátt með að þurfa vinna á aðfangadagskvöld og var því ákveðið að hafa lokað. Fjöldi fyrirspurna um borð hafa þó borist.

Þá er einnig hægt að komast í hversdagslegri stemningu og verður til að mynda opið á kebabstaðnum Ali Baba í Veltusundi þar sem boðið er upp rétti samkvæmt hefðbundnum matseðli, en þar má meðal annars finna kjúklinga shawarma-rúllu og hamborgara. Einnig var opið á síðasta ári og segir starfsmaður veitingastaðarins að þó nokkrir hafi lagt leið sína þangað.

Jólaborgin Reykjavík

Mikil aukning hefur verið á erlendum ferðamönnum sem sækja landið heim yfir áramót og er að verða full bókað á mörgum hótelum í Reykjavík. Skapti Örn Ólafsson, upplýsingafulltrúi Samtaka ferðaþjónustunnar, segir jólin hafa á síðustu árum verið að koma sterkari inn, þó þau hafi enn ekki náð vinsældum áramótanna. Hann segir aukningu ferðamanna á þessum árstíma fyrst og fremst hafa verið á höfuðborgarsvæðinu.

Árið 2011 komu tæplega 21 þúsund erlendir ferðamenn til landsins í desember, en í fyrra voru þeir hátt í 42 þúsund talsins. Bjartsýnustu spár gera ráð fyrir milli 50 og 60 þúsund erlendum ferðamönnum í desember á þessu ári. „Það eru ekki mörg ár síðan lokað var yfir hátíðirnar hjá mörgum hótelum í Reykjavík og einhver hótel skiptust á að hafa opið á milli ára,“ segir Skapti. „Núna er nánast opið á öllum hótelum og passað upp á opnunartíma veitingastaða, þannig að tryggt sé að erlendir gestir komi ekki að lokuðum dyrum,“ segir hann.

Þá segir hann óhætt að segja að Reykjavík sé komin á kortið sem jólaborg á evrópska vísu, enda hafi Höfuðborgarstofa unnið markvisst að því undanfarin ár en til dæmis má nefna að Reykjavíkurborg hefur komist á lista CNN-fréttastofunnar yfir áhugaverðustu vetrar- og jólaáfangastaði í heimi.