Annað árið í röð er flugfélagið WOW air valið sjöunda besta lággjaldaflugfélagið í Evrópu samkvæmt World Airline Awards. Samkvæmt tilkynningu frá félaginu er valið í höndum farþega en fjöldi ferðamanna um allan heim tekur þátt á hverju ári í stærstu ánægjukönnun um gæði flugfélaga og flugvalla víðs vegar um heiminn. Hefur breska fyrirtækið Skytrax haldið utan um þessa skoðanakönnun síðastliðin 16 ár yfir bestu flugfélögin og flugvellina í heiminum.
„Það er mikill heiður að komast á þennan topp tíu lista annað árið í röð, sérstaklega þar sem valið er í höndum farþega. Við settum okkur fjögur lykilmarkmið frá upphafi félagsins sem við höfum reynt að standa við; bjóða upp á lægsta verðið, vera stundvísust, nýjar vélar og ávallt bjóða upp á ferska og skemmtilega þjónustu. Þetta hefur augljóslega skilað sér til farþega okkar,“ segir Skúli Mogensen, forstjóri og stofnandi WOW air, í tilkynningu.
Hér að neðan má sjá listann yfir bestu lággjaldaflugfélögin í Evrópu.
1 Norwegian
2 easyJet
3 Germanwings
4 NIKI
5 airBaltic
6 Wizz Air
7 WOW Air
8 Pegasus Airlines
9 Onur Air
10 flyBe