Angela Merkel lýsti því yfir eftir að hafa fundað með Matteo Renzi, forsætisráðherra Ítalíu, í dag að hún hafi fulla trú á því að efnahagsaðgerðir hans muni koma þjóðinni til góðs. Renzi hefur boðað miklar breytingar á stjórnskipun og kosningafyrirkomulagi landsins á næstu misserum.
„Ég trúi ekki að ákvörðun Evrópska seðlabankans muni hægja á breytingunum á Ítalíu. Ég býst ekki við öðru en að hugmyndir hans verði að veruleika,“ sagði Merkel.
Renzi er einnig sagður vilja beita sér fyrir því að fastar verði tekið á skattaundanskoti og gera breytingar á vinnumarkaðslöggjöfinni.
Merkel og Renzi eru þó ósammála um kaup evrópska seðlabankans á skuldabréfum á markaði. Merkel hefur lýst yfir áhyggjum af því að þetta muni gera stjórnvöldum auðveldara að bæta við skuldir sínar, í stað þess að fara í aðgerðir sem miða að nauðsynlegum niðurskurði og sparnaði.
Renzi aftur á móti telur að skuldabréfakaupin eigi eftir að vera innspýting í hagkerfið, auka hagvöxt og fjölga störfum.