179 gjaldþrot í byggingarstarfsemi

Gjaldþrotum einkahlutafélaga á árinu 2014 fækkaði um 14 prósent frá fyrra ári. Alls voru 795 fyrirtæki tekin til gjaldþrotaskipta á árinu, samanborið við 920 árið áður. Gjaldþrotum í flokknum „Fasteignaviðskipti“ hefur fækkað mest, eða um 36 prósent.

Gjaldþrotum í flokkum „Leigustarfsemi og ýmis sérhæfð þjónusta“ fjölgaði hins vegar mest milli ára, eða um 22 prósent. Flest gjaldþrot voru í flokknum „Byggingarstarfsemi og mannvirkjagerð“ eða alls 179.

Nýskráðum einkahlutafélögum á árinu 2014 fjölgaði um 6 prósent samanborið við fyrra ár. Alls voru 2.050 ný félög skráð á árinu. Mest fjölgun nýskráninga var í flokknum Sérfræðileg, vísindaleg og tæknileg starfsemi, eða sem nemur 33 prósentum. Í sama flokki fjölgaði gjaldþrotum næst mest, eða um 11 prósent, og voru alls 62 talsins.

• Blogga um frétt