Alþjóðlega matsfyrirtækið Fitch Ratings hefur breytt horfum um lánshæfiseinkunn ríkissjóðs Íslands úr stöðugum í jákvæðar. Einkunnin fyrir langtímaskuldbindingar ríkissjóðs í erlendri mynt er BBB og í innlendri mynt er hún BBB+.
Einkunnir fyrir skuldabréf (e. senior unsecured bonds) í erlendri og innlendri mynt eru staðfestar sem BBB og BBB+. Landseinkunnin (e. Country Ceiling) er staðfest sem BBB og jafnframt er staðfest lánshæfismatið F3 fyrir skammtímaskuldbindingar í erlendri mynt.
Í rökstuðningi fyrirtækisins kemur fram að samningar um lengingu í afborgunarferli á skuldabréfi Nýja Landsbankans vógu einna þyngst við breytingu á horfum í lánshæfismati ríkissjóðs í jákvæðar. Samningarnir voru gerðir samhliða veitingu undanþágu frá gjaldeyrishöftum og fólu í sér 400 milljarða króna greiðslu til forgangskröfuhafa í gamla Landsbankanum. Samningar um breytta skilmála skuldabréfsins auk undanþágunnar vegna greiðslu til forgangskröfuhafa voru mikilvæg skref í átt að afnámi gjaldeyrishafta að sögn matsfyrirtækisins.
Batnandi afkoma ríkissjóðs og opinberra fjármála hafði einnig jákvæð áhrif á breytingu á horfum í lánshæfismati ríkissjóðs að mati Fitch. Heildarjöfnuður var jákvæður á árinu 2014 og frumjöfnuður hefur verið jákvæður síðan 2012. Skuldahlutfall hefur batnað verulega bæði vegna bættrar afkomu ríkisfjármála sem og hagvaxtar.