Þrátt fyrir að enn séu rúmlega sex vikur í páskadag er nokkuð síðan fyrstu páskaeggin rötuðu í hillur matvöruverslana landsins. Hitað er upp með minnstu eggjunum og smá saman munu þau öll rata í verslanirnar, litrík og girnileg. Í ár eru páskarnir í byrjun apríl en páskadagur er 5. apríl.
Sælgætisgerðin Nói Síríus seldi um tíu þúsund páskaegg úr landi í fyrra og er gert ráð fyrir svipaðri sölu í ár.
Eggin eru einna helst flutt til Norðurlandanna og vilja flestir egg númer 4 og 5. Íslendingar búsettir erlendis virðast einna helst sækjast eftir eggjunum og eru þau seld í gegnum milliliði, ekki beint til viðskiptavina.
Freyja selur aðallega páskaegg til Færeyja en einnig til Norðurlandanna. Að sögn Péturs Blöndal, forstjóra Freyju, hefur sælgætisgerðin selt sælgæti til Færeyja í mörg ár og hefur salan þar aukist frá ári til árs.
Á Norðurlöndunum eru það aftur á móti aðallega Íslendingar sem kaupa egg og eru Drauma, Rís- og ævintýraeggin vinsælust. „Við skópum þessa hefð með að eitthvað sé í skelinni og svo hafa hinir elt,“ segir Pétur.
Ekki fengust upplýsingar um fjölda páskaeggja sem Freyja selur úr landi á ári hverju.
Sælgætisgerðin Góa selur aðeins páskaegg hér á landi.