Dow Corning, stærsti framleiðandi heims á vörum gerðum úr kísilefnum, er samkvæmt heimildum Morgunblaðsins það fyrirtæki sem kísilframleiðandinn Thorsil samdi við í vikunni um kaup á framleiðslu fyrirtækisins í væntanlegri verksmiðju í Helguvík.
Forsvarsmenn Thorsil hafa hins vegar ekki viljað gefa upp við hvaða fyrirtæki samið var. Samningurinn er til næstu 10 ára um árlega sölu á 20 þúsund tonnum af kísildufti, kísilmálmi og gjalli.
Samningurinn hljóðar upp á 75 milljarða króna til næstu tíu ára en forsvarsmenn fyrirtækjanna hafa þó hug á því að lengja samninginn um 8 ár, að því er fram kemur í umfjöllun um mál þetta í Morgunblaðinu í dag.