Hjá íslenska fragtflugfélaginu Bláfugli starfa 32 flugmenn. Þar af eru 26 verktakar en einungis sex þeirra eru með kjarasamning við Félag íslenskra flugmanna. Verktakarnir voru ráðnir í gegnum hollenska áhafnaleigu og eru með lægri laun en flugmenn eiga rétt samkvæmt íslenskum kjarasamningum.
Samkvæmt ráðningarsamningi sem mbl hefur undir höndum nema laun flugmanns á vegum áhafnaleigunnar 4.500 evrum fyrir 75 flugtíma, eða um 670 þúsund krónum auk 1.000 evra viðbótargreiðslu, eða um 150.000 krónum, fyrir störf þar á milli. Alls um 826 þúsund krónur.
Þá á eftir að taka tillit til orlofs, veikindaréttar, sem er lögbundinn fyrir útsenda starfsmenn, desember- og orlofsuppbóta, slysa- og líftrygginga, fatapeninga, dagpeninga, framlaga í lífeyrissjóð, greiðslna í sjúkrasjóð vegna aukins veikindaréttar, uppsagnarfresta og annarra grundvallarréttinda sem verktakinn nýtur ekki.
Samkvæmt því sem fram kom hjá Samtökum atvinnulífsins fyrir síðustu kjarasamninga, áður flugmenn Icelandair fengu 8 prósent launahækkun, voru þeir að meðaltali með um 770 þúsund í föst mánaðarlaun. Að viðbættum launaliðum sem greiddir eru við hverja launaútborgun, s.s. akstursgreiðslur, álagsgreiðslur og hlunnindi, voru regluleg laun þeirra regluleg laun þeirra 852.000 og heildarlaun 912.000.
Laun verktakans, sem þó telst í skilningi íslenskra og evrópskra laga einungis vera gerviverktaki, þyrftu því að vera hærri til þess að vera jöfn launakjörum íslenskra flugmanna.
Steinn Logi Björnsson, framkvæmdarstjóri Bláfugls, segir flugmennina hafa verið ráðna sem verktaka til þess að auka sveigjaleika í rekstri. Það hafi ekki verið gert til þess að spara pening. Hann bendir á að að Bláfugl starfi einnig sem verktaki fyrir önnur fyrirtæki og að þeim gæti allt eins verið sagt upp með stuttum fyrirvara.
Þá segist hann eiga í kjarasamningaviðræðum við Félag íslenskra atvinnuflugmanna og að þeir hafi beinlínis hótað því að beita sér gegn þeim vegna verktökunnar.
Bláfugl er með flugrekstrarleyfi á Íslandi og samanstendur floti þeirra af fimm Boeing 737 fraktvélum auk þess sem sú sjötta mun bætast við í apríl. Félagið er í eigu Haru Holding ehf., sem er í sömu aðila og eiga Air Atlanta. Helstu eigendur og stjórnendur Air Atlanta eru: Hannes Hilmarsson, forstjóri, Helgi Hrafn Hilmarsson, Stefán Eyjólfsson og Geir Valur Ágústsson. Flugfloti félagsins samanstendur af fimm Boeing 737 fraktvélum en sú sjötta mun bætast við í apríl
Samkvæmt upplýsingum frá Vinnumálastofnun eru málefni Bláfugls ekki á þeirra borði en stofnunin tekur mál til skoðunar eftir að ábendingar berast, líkt og var í máli Primera Air flugfélagsins. Alþýðusamband Íslands afhenti þeim á dögunum gögn sem eru sögð sýna fram á að flugfélagið brjóti á réttindum starfsmannanna.
Alþýðusamband Íslands hefur bent á að áhafnir flugfélaga með heimahöfn á Íslandi eigi rétt á lágmarkslaunum og lágmarkskjörum skv. íslenskum kjarasamningum og íslenskum lögum. Þetta séu og verða skyldur viðkomandi fyrirtækja og sem skýrt endurspeglast í Samkomulagi ASÍ og SA um útlendinga á íslenskum vinnumarkaði. „Samtökin eru sammála um að félagsleg undirboð grafi ekki bara undan réttarstöðu launafólks heldur grafi þau einnig undan samkeppnishæfni þeirra fyrirtækja sem rækja skyldur sínar með réttum hætti á íslenskum vinnumarkaði,“ sagði í tilkynningu ASÍ á dögunum.
Þá sló Evrópudómstóllinn því einnig föstu, að greiða skuli útsendum starfsmönnum á EES svæðinu laun og önnur kjör í samræmi við ákvæði þeirra kjarasamninga sem gilda þar sem þeir vinna, nema og þá því aðeins að heimakjörin séu betri.
Steinn Logi segist ósammála því að dómurinn eigi við um flugmennina þar sem dómurinn vísi til almennra kjarasamninga á markaði, en ekki sértækra líkt og samninga FÍA við Icelandair.
Í nýrri rannsókn um óhefðbundin ráðningarform sem var birt í síðustu viku var gerviverktaka í flugi tengd við flugöryggi með afdráttarlausum hætti. Rannsóknin var unnin var á vegum háskólans í Ghent í Belgíu í samvinnu við fulltrúa frá samtökum stéttarfélaga og atvinnurekenda en kostuð af Framkvæmdastjórn Evrópusambandsins. Þar kemur jafnframt fram að fjórir af hverjum tíu flugmönnum undir þrítugu í Evrópu vinna sem gerviverktakar í gegnum starfsmannaleigu. Í skýrslunni er bent á að laun gervi-verktakaflugmanna séu oft tengd vinnuframlagi meira en eðlilegt geti talist og að enginn veikindaréttur sé til staðar. Þetta geti m.a. leitt til þess að flugmenn mæta frekar veikir til vinnu. Þá segir einnig að þessir flugmenn telji sig síður hafa nægt sjálfstæði í starfi til þess að taka mikilvægar ákvarðanir um flugöryggi.
Alþýðusamband Íslands hefur skorað á íslensk stjórnvöld að taka starfsemi Primera Air og Primera Air Nordic hér á landi til rækilegrar skoðunar og stöðva starfsemi þeirra þar til úrbætur hafa verið gerðar.