Mestu munaði um Landsbankabréfið

Undirliggjandi erlend staða þjóðarbússins í árslok 2014 er metin neikvæð um 880 milljarða króna eða 45% af áætlaðri vergri landsframleiðslu ársins 2014 en til samanburðar var staðan í lok þriðja ársfjórðungs metin neikvæð um 929 milljarða Undirliggjandi staða hefur því batnað á fjórða ársfjórðungi um 49 milljarða króna eða um 2,5% af vergri landsframleiðslu.

Þetta kemur fram í bráðabirgðayfirliti Seðlabankans um greiðslujöfnuð við útlönd á fjórða ársfjórðungi 2014 og um erlenda stöðu þjóðarbúsins í lok ársfjórðungsins. 

Stærsta hreyfingin í ársfjórðungnum var rúmlega 400 milljarða króna útgreiðsla LBI til kröfuhafa en félagið notaði að hluta til innlán í erlendum gjaldmiðlum sem geymd voru í innlendu viðskiptabönkunum. Viðskiptabankarnir seldu erlendar skammtímaeignir á móti úttekt innlánanna sem veldur lækkun á erlendri eignahlið þjóðarbúsins án innlánsstofnana í slitameðferð en á móti dregur úr neikvæðum reiknuðum áhrifum af slitum búanna.

Hrein staða við útlönd var neikvæð um 7.835 milljarða króna eða 398% af vergri landsframleiðslu við lok árs 2014. Að frátöldum innlánsstofnunum í slitameðferð var staðan neikvæð um 121 milljarða króna eða 6% af vergri landsframleiðslu. Talið er að slit innlánsstofnana í slitameðferð hafi neikvæð áhrif á hreinu stöðuna sem nemur 759 milljarða eða 39% af vergri landsframleiðslu.

Seðlabanki Íslands Árni Sæberg

• 2 blogg um fréttina

Bloggað um fréttina

• Kristbjörn Árnason: Laun heimsins eru vanþakklæti
• sleggjuhvellur: Icesave bréfið sem var "kosið burt"