Gjaldeyrisforði Seðlabanka Íslands jókst um 42,5 milljarða króna árið 2014. Í lok desember 2013 stóð forðinn í um 488 milljörðum króna en um 530 milljörðum í lok desember 2014.
Þetta kemur fram í ársskýrslu Seðlabankans sem var birt í dag. Hinn 31. desember 2014 var gjaldeyrisforði Seðlabankans 530 milljarðar króna eða 4,2 milljarðar Bandaríkjadala sem samsvarar 28% af landsframleiðslu Íslands 2013. Gjaldeyrisforði landsins samsvarar nú átta mánaða vöru- og þjónustuinnflutningi og 32% af peningamagni og sparifé.
Helstu breytingar til aukningar á forða á tímabilinu voru skuldabréfaútgáfa ríkisins í evrum sem nam 116 milljörðum króna og gjaldeyriskaup á millibankamarkaði sem juku forðann um 111 milljarða.
Helstu breytingar sem minnkuðu forðann á tímabilinu má rekja til fyrirframgreiðslu á Norðurlandalánum sem nam um 114 milljarða króna fyrirframgreiðslu AGS-láns sem nam um 51 milljarði og greiðslu 200 milljóna Bandaríkjadala vegna láns ríkissjóðs sem nam um 22 milljörðum króna.
Á árinu 2014 hélt Seðlabankinn fjögur útboð sem lið í fyrri áfanga áætlunar um losun fjármagnshafta frá 25. mars 2011. Hrein áhrif útboðanna höfðu óveruleg áhrif á stærð forðans en áhrifin voru til aukningar um 0,2 milljarða króna á árinu.
Gjaldeyrisforðinn dregur úr áhrifum af ytri áhættu tengdri breytingum á aðgangi að lánsfé erlendis og sveiflum í fjármagnsstreymi til og frá landinu. Forðinn gerir bankanum kleift að aðstoða ríkissjóð við að mæta þörfum fyrir erlendan gjaldeyri og standa við erlendar lánaskuldbindingar. Gjaldeyrisforði skapar þá tiltrú á mörkuðum að landið geti staðið við erlendar skuldbindingar sínar. Þá má nota gjaldeyrisforða til að styðja við peningastefnuna.