Arkur ehf., fjárfestingarfélag Steinunnar Jónsdóttur, keypti í dag 16,2 milljónir hluta í Sjóvá að andvirði um 176 milljónir króna.
Steinunn Jónsdóttir fjárfestir, er dóttir Jóns Helga Guðmundssonar sem gjarnan er kenndur við Byko. Fyrir viðskiptin í dag átti Steinunn um 63,8 milljónir hluta í Sjóva og nemur heildareign hennar nú 80 milljónum hluta, eða alls 5,02 prósent af heildarhlutafé.
Gengið í Sjóvá er 10,92 krónur í dag og er heildareignarhlutur hennar því að andvirði um 873 milljóna króna.
Samþykkt var á aðalfundi félagsins í síðustu viku að greiða arð er nemur um 4 milljörðum króna, eða 2,51 krónu á hlut fyrir árið 2014.
Arðsákvörðunardagur er 26. mars 2015 og þar af leiðir að skráðir hluthafar í lok dags 30. mars 2015, sem telst arðsréttindadagur, eiga rétt á arðgreiðslu. Fyrsti viðskiptadagur eftir arðsákvörðunardag er 27. mars 2015 og er hann arðleysisdagur. Útborgunardagur arðs er 16. apríl 2015.