Reyndu að kaupa hlut Sparisjóðsins

Félag í eigu lykilstjórnenda greiðslumiðlunarfyrirtækisins Borgunar gerðu ítrekaðar tilraunir til að kaupa 0,4% hlut Sparisjóðs Vestmannaeyja í Borgun á síðustu mánuðum.

Ekki var gengið að þeim tilboðum sem lögð voru fram. Á gamlársdag í fyrra keyptu stjórnendur Borgunar hins vegar 0,3% hlut Sparisjóðs Norðfjarðar í fyrirtækinu. Fyrir hlutinn voru greiddar 22,2 milljónir króna.

Hægt er að ganga út frá því að tilboð í hlut Sparisjóðs Vestmannaeyja hafi ekki verið lægra en það sem boðið var fyrir austan og því hafi tilboðið í 0,4% hlutinn numið að lágmarki 28,1 milljón króna, að því er fram kemur í umfjöllun um þetta mál í Morgunblaðinu í dag.