Benetton greiðir bætur til fórnarlamba

Ítalska tískuverslanakeðjan Benetton hefur tilkynnt að hún ætli að leggja 1,1 milljón dollara til alþjóðlegs sjóðs sem á að greiða bætur til þeirra sem eiga um sárt að binda eftir að stór fataverksmiðja í Bangladess hrundi fyrir tveimur árum. Rúmlega 1.100 manns létust.

Benetton neitaði í fyrstu að hafa neitt með verksmiðjuna að gera. Nú hefur það hins vegar látið sérfræðinga ráðgjafarfyrirtækisins PwC meta hversu mikið fé fyrirtækið ætti að láta af hendi rakna til sjóðsins í hlutfalli við tengsl þeirra við Rana Plaza-verksmiðjuna. Í tilkynningu kemur fram að fyrirtækið hafi ákveðið að tvöfalda þá upphæð sem ráðgjafarnir mæltu með.

Stafsmenn og blaðamenn höfðu varað við því að byggingin sem var á níu hæðum væri ekki örugg. Hún hrundi svo 24. apríl árið 2013 en þá voru þúsundir manna inni í byggingunni.

Fleiri en milljón manns höfðu skrifað undir undirskriftarlista þar sem Benetton var hvatt til þess að leggja sitt af mörkum til sjóðsins sem settur var á fót átta mánuðum eftir hörmungarnar til að hjálpa fórnarlömbunum.

Alþjóðavinnumálastofnunin ILO skipulagði sjóðinn en í hann hafa safnast 21 milljón dollara. Enn vantar níu milljónir dollara upp á að hann geti greitt út þær bætur sem lagt var upp með.

• Blogga um frétt