Ljóst er að tilkynning Marel hefur vakið athygli fjárfesta þar sem gengi hlutabréfa í félaginu hefur rokið upp um átta prósent frá opnun markaða í morgun. Veltan nemur 629 milljónum króna.
Líkt og mbl.is greindi frá í morgun hafa stjórnendur unnið drög að uppgjöri Marel fyrir fyrsta ársfjórðung og með hliðsjón af þeim er það mat þeirra að afkoma félagsins á fyrsta ársfjórðungi sé umfram væntingar.
Þetta kom fram í tilkynningu frá félaginu þar sem jafnframt sagði að góð staða væri byggð á auknum tekjum, hagstæðri tekjudreifingu og aukinni skilvirkni í rekstri félagsins.
Þá sagði að mótteknar pantanir í fjórðungnum séu áætlaðar 212 milljónir evra. Tekjur fjórðungsins verða um 209 milljónir evra, með leiðréttan rekstrarhagnað yfir 11% af tekjum og rekstrarhagnað tæplega 8% af tekjum. Hagnaður eftir skatt í fyrsta ársfjórðungi er áætlaður rúmlega 12 milljónir evra.
Frétt mbl.is: Afkoma Marel umfram væntingar