Stærsta smásölukeðja Bretlands, Tesco, tapaði 5,74 milljörðum punda, 1.175 milljörðum króna, á síðasta rekstrarári. Rekstrarárið á undan nam hagnaður Tesco 974 milljónum punda.
Í fréttatilkynningu frá Tesco segir forstjóri fyrirtækisins, Dave Lewis, að árið hafi reynt fyrirtækinu erfitt. Tesco afskrifaði 7 milljarða punda í ársuppgjörinu, aðallega vegna virðislækkunar eigna.
Ef ekki er tekið tillit til afskrifta og annarra liða í uppgjörinu sem eru óvenjulegir, þá nam hagnaður fyrirtækisins fyrir skatta 961 milljón punda sem er 68% lækkun milli rekstrarára.
Lewis, sem tók við starfi forstjóra í september, segir að markaðsumhverfið sé erfitt í verslunarrekstri en skömmu eftir að hann tók við sem forstjóri tilkynnti Tesco um að fyrirtækið hefði ofreiknað hagnað félagsins um 263 milljónir punda.
Efnahagsbrotadeild bresku lögreglunnar rannsakar nú bókhald Tesco sem er þriðja stærsta matvörukeðja heims á eftir Walmart og Carrefour.