Sprotafyrirtækið Sólfar lauk í dag hlutafjáraukningu með aðkomu breiðs hóps erlendra og innnlendra fjárfesta. Sólfar þróar leiki fyrir sýndarveruleika og er stofnað af þremur fyrrum stjórnendum CCP.
Fjárfestingafélagið Investa, sem fjárfestir í íslenskum sprotafyrirtækjum, leggur til hlutafé ásamt fagfjárfestinum Vilhjálmi Þorsteinssyni en hann og Hilmar Gunnarsson frá Investa hafa tekið sæti í stjórn Sólfars.
Í tilkynningu segir að það sæti jafnframt tíðindum að um helmingur hlutafjáraukningar Sólfars komi frá erlendum fjárfestum í Finnlandi, Bandaríkjunum og Bretlandi. Þeirra á meðal er finnski sprotasjóðurinn Sisu Game Ventures, fagfjárfestirinn Ville Miettenen sem hefur komið að stofnun fjölmargra hugbúnaðarfyrirtækja í Finnlandi og Isaac Kato, meðstofnandi og fjármálastjóri Verne Global.
Það er eintaklega ánægjulegt að fá svo breiðan hóp fjárfesta að félaginu hér á landi og ekki síður erlendis,“ er haft eftir Kjartani Pierre Emilssyni, framkvæmdastjóra Sólfars, í tilkynningu. „Aðkoma nýrra hluthafa sem sérhæfa sig í stuðningi við sprotafyrirtæki á borð við okkar mun reynast Sólfari vel, bæði hvað varðar tengslanet þeirra þegar kemur að vöruþróun og markaðssetningu sem og frekari fjármögnun félagsins á komandi misserum.”
Stofnendur Sólfars eru Reynir Harðarson, Kjartan Pierre Emilsson og Þorsteinn Högni Gunnarsson en þeir hafa allir unnið í tölvuleikja og hugbúnaðargeiranum í liðlega 20 ár, nú síðast hjá CCP þar sem þeir voru í stjórendahóp til margra ára og í tilfelli Reynis meðstofnandi þess félags.
Sólfar einbeitir sér alfarið að þróun og útgáfu leikja og upplifana fyrir sýndarveruleikabúnað á borð við Oculus Rift frá Facebook og Project Morpheus frá Sony, en þessi tól eru væntanleg á markað á komandi ári. Félagið stefnir að markaðssetningu sinna fyrstu verkefna samhliða útgáfu þessa búnaðar, en sýndarveruleiki eða “virtual reality” er markaður sem margir horfa til sem stærsta vaxtarbrodds tölvuleikjageirans næstu árin.