Það sem af er ári hafa óverðtryggð skuldabréf skilað neikvæðri ávöxtun upp á 2,2%, á meðan verðtryggð skuldabréf hafa skilað 6,4% jákvæðri ávöxtun.
Í markaðspunktum Arion banka er bent á að verðlagning á skuldabréfum á markaði endurspegli vaxandi áhyggjur fjárfesta af verðbólgu, sem gæti orðið afleiðing þess ef launahækkanir verða umfram það svigrúm sem hagkerfið leyfir og að launakostnaði yrði þrýst út í verðlag, að því er fram kemur í Morgunblaðinu í dag.
Síðustu tvö ár hafa óverðtryggð skuldabréf skilað ávöxtun umfram verðtryggð skuldabréf, sem einkum má rekja til samfelldrar lækkunar verðbólgu undanfarin misseri í kjölfar hóflegra kjarasamninga og lækkunar á verðlagi erlendis. Þá lækkaði Seðlabankinn stýrivexti um samtals 75 punkta í lok síðasta árs sem hafði í för með sér hækkun á verði skuldabréfa.