Forstjóri Fjármálaeftirlitsins, Unnur Gunnarsdóttir, neitar að tjá sig um þau mistök sem urðu hjá starfsmanni eftirlitsins og urðu til þess að trúnaðarupplýsingar varðandi fjárhagslega stöðu Sparisjóðs Norðurlands voru gerðar opinberar.
Í umfjöllun um mál þetta í Morgunblaðinu í dag kemur fram, að nú er unnið að sameiginlegri yfirlýsingu FME og Seðlabankans vegna mistakanna en stofnanirnar vinna nú að því að varpa frekara ljósi á hvernig það gat gerst að Seðlabankinn fékk þær upplýsingar að viðkomandi gögn væru hæf til birtingar þegar trúnaður átti í raun að ríkja um þau.
Forsvarsmenn Sparisjóðs Norðurlands undirbúa nú bréf til beggja stofnananna vegna uppákomunnar að sögn Hólmgeirs Karlssonar stjórnarformanns sjóðsins en hann las um það í fjölmiðlum að Seðlabankinn hefði birt opinberlega upplýsingar um eiginfjárstöðu sjóðsins og heildartap af rekstri hans á síðasta rekstrarári.