Helgi Sigurðsson hæstaréttarlögmaður segir að sá starfsmaður Seðlabankans sem beri ábyrgð á því að gögn sem trúnaður átti að ríkja um og voru birt í skýrslu bankans hafi brotið gegn þagnarskylduákvæðum laga.
Slík brot kunna að varða refsiábyrgð og telur Helgi að það hljóti að koma til skoðunar að Seðlabankinn áminni viðkomandi starfsmann, að því er fram kemur í umfjöllun um mál þetta í ViðskiptaMogganum í dag.
Í svari Seðlabankans við fyrirspurn Morgunblaðsins kemur fram að Már Guðmundsson, bankastjóri, beri ábyrgð á öllu útgefnu efni bankans. Talsmaður bankans segir að verið sé að skoða mál tengd fyrrnefndum mistökum en vill ekki upplýsa í hverju sú skoðun felst né heldur á hvers hendi hún sé.