Grikkjum tókst með naumindum að forðast greiðslufall í dag en greiðslufallið hefði getað þýtt að ríkinu yrði gert að yfirgefa evru-svæðið. Hætta er á að það sé skammgóður vermir því þegar hefur verið varað við öðru mögulegu greiðslufalli eftir tvær vikur ef ekki tekst að semja við lánadrottna.
Ríkisstjórn Grikklands tókst í gær að skrapa saman nægu fé til þess að greiða afborgun af 750 milljón evra láni Alþjóðagjaldeyrissjóðsins, samkvæmt upplýsingum frá gríska fjármálaráðuneytinu.
Ágætlega miðar í viðræðum Grikkja og fjármálaráðherra evru-ríkjanna en enn hefur ekki tekist að ná samkomulagi.
Fjármálaráðherra Grikklands, Yanis Varoufakis, viðurkennir að Aþena standi frammi fyrir fjármálakreppu á sama tíma og landið reynir að standa við afborganir af þeim 240 milljörðum evra sem landið hefur fengið að láni á undanförnum árum frá öðrum ríkjum Evrópu og alþjóðlegum fjármálastofnunum.