Milljónir munu nota Vivaldi-vafrann

Seltirningurinn Jón von Tetzchner vinnur ásamt þrjátíu manna starfsliði sínu að þróun nýs netvafra sem 1,3 milljónir manna hafa nú þegar hlaðið niður á tölvur sínar, þrátt fyrir að forritið sé ekki fullmótað.

Jón var tvítugur að aldri þegar hann fluttist til Noregs þar sem hann nam tölvunarfræði. Í kjölfarið réði hann sig til norska ríkissímafélagsins en þegar það var einkavætt keypti hann eigin þróunarvinnu út úr fyrirtækinu. Fimmtán árum síðar hætti hann sem forstjóri Opera software en þá nýttu yfir 100 milljónir manna um heim allan þá tækni sem hann og samstarfsmenn hans höfðu þróað.

Árið 2013 sneri Jón aftur heim á Seltjarnarnesið með rúma þrjá milljarða til fjárfestinga innan hafta. Samhliða fjárfestingunum vinnur hann að smíði netvafrans Vivaldi, að því er fram kemur í samtali við Jón í ViðskiptaMogganum í dag.