Ný útgáfa af Quizup í dag

Endurbætt útgáfa Quizup.
Endurbætt útgáfa Quizup.

Ný útgáfa af QuizUp, sem tengir fólk á nýjan máta, kemur út í dag. Leikurinn hefur verið algjörlega endurhannaður og nú verður einnig hægt að spila QuizUp á heimasíðu leiksins.

Íslenski tölvuleikjaframleiðandinn Plain Vanilla kynnti í dag til sögunnar nýja útgáfu af QuizUp spurningaleiknum sem er sá stærsti sinnar tegundar í heiminum. 

Fyrri útgáfan, sem kom út árið 2013, hefur verið tekin í gegn en í þeirri nýju er lögð meiri áhersla á samskipti og að tengja fólk með svipuð áhugamál saman. Að auki hefur vefurinn QuizUp.com tekið miklum breytingum og geta notendur í borð- og fartölvum nú spilað leikinn í gegnum síðuna.

Ein áhugaverðasta viðbótin í nýja QuizUp er fréttaveita svipuð þeim sem er í ýmsum samfélagsmiðlum. Fréttaveitan er sérsniðin að hverjum og einum og auðveldar spilurum að eignast nýja vini og áhugamál. 

Helstu nýjungarnar í QuizUp:

  • Nýtt viðmót til að auðvelda spilurum að finna nýja spurningaflokka.
  • Fréttaveita þar sem notandinn getur skoðað uppfærslur frá nýjum spurningaflokkum sem vinir hans fylgja, titla sem þeir hafa unnið sér inn, séð nýja vini vina o.fl.
  • Nýjar prófílsíður notenda sýna persónulegar stöðuuppfærslur þeirra, myndir, sameiginleg áhugamál líkt og aðrir samfélagsmiðlar en einnig tölfræði úr leikjum þeirra, í hvaða spurningaflokkum þeir keppa helst o.fl.
  • Notendur geta fylgt (e. follow) vinum sínum og ákveðnum efnisflokkum.
  • Hægt að leita að andstæðingum eftir aldri, kyni, fjarlægð frá notanda og áhugamálum.
  • Hægt að fletta í gegnum notendur til að finna næsta andstæðing og sjá hvaða vinir og spurningaflokkar eru sameiginlegir.

600 þúsund spurningar

Í nýrri útgáfu leiksins er að finna yfir 600 þúsund spurningar í 1.200 flokkum. 33 milljónir manna hafa náð í eldri útgáfu leiksins og 30 þúsund nýir notendur bætast við hvern einasta dag. Virkir spilarar spila tæplega 7 milljónir leikja á dag og eyða að meðaltali 30 mínútum í að spila leikinn dag hvern. Í heildina hafa verið spilaðir rúmlega 4 milljarðar leikja þar sem spilarar hafa svarað 28 milljörðum spurninga.

Þorsteinn Baldur Friðriksson, stofnandi og framkvæmdastjóri Plain Vanilla, segir að leikurinn sé að öllu leyti hannaður á Íslandi, nánar tiltekið á Laugavegi 77, þar sem vinna nú um 85 manns. „Við erum búin að leggja allt okkar hugvit í þessa nýju útgáfu og þetta er því mjög stór dagur í sögu fyrirtækisins,“ er haft eftir Þorsteini í tilkynningu.

Frétt mbl: Quizup er vinsælasti leikurinn í Kína

Þorsteinn Baldur Friðriksson, stofnandi og framkvæmdastjóri Plain Vanilla.
Þorsteinn Baldur Friðriksson, stofnandi og framkvæmdastjóri Plain Vanilla.
mbl.is
Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK