Skuldabréf fær i.AAA einkunn í fyrsta sinn

Matsfyrirtækið Reitun gaf út í gær mánaðarskýrslu sína fyrir aprílmánuð. Þar kemur m.a. fram að lánshæfismat Reitunnar á sértryggðum skuldabréfum, útgefnum af Arion banka hf., hækkar í hæstu mögulega einkunn eða i.AAA í lok apríl. Útgáfan er sú fyrsta sem hlýtur i.AAA einkunn frá Reitun.

Þetta kemur fram í Mánaðarskýrslu Reitunar og morgunpósti IFS greiningar. Hækkunin kemur í kjölfar hækkunar á lánshæfiseinkunn bankans auk þess sem yfirveðsetning í tryggingasafni er rífleg.

Reitun uppfærði þá einnig lánshæfismat Arion banka og hækkaði lánshæfismatið í i.A2. Áframhaldandi bati í eignagæðum, hækkandi eiginfjárþáttur A, góð arðsemi af kjarnastarfsemi og ágætar hagvaxtarhorfur eru meginástæður hækkunar á lánshæfiseinkunn. Úrvinnsla vandræðalána er sögð hafa gengið samkvæmt áætlun og gæði lánasafnsins aukist til muna auk þess sem hlutfall íbúðalána í lánasafni hefur hækkað og veðstaða áfram batnað samhliða hækkandi fasteignaverði

OR hækkar um tvo flokka

Einnig var í mánuðnum uppfærð lánshæfismat á Orkuveitu Reykjavíkur og er mat Reitunar A1 með stöðugum horfum. Lánshæfismatið hefur því hækkað um tvo flokka, úr i.A3 í i.A1. Horfum í lánshæfi Orkuveitunnar var breytt í jákvæðar í janúar sl. og staðfesti uppgjör félagsins þá þróun sem væntingar stóðu til um.

• Blogga um frétt