Gagarín hlaut bæði gull- og silfurverðlaun í flokki stafrænnar hönnunar í samkeppni á vegum European Design Awards fyrir gagnvirk sýningaratriði sem fyrirtækið hefur unnið að í Noregi og Kanada.
Fyrirtækið segir í tilkynningu, að það hafi hlotið gullverðlaun fyrir hönnun og þróun fjögurra gagnvirkra sýningaratriða fyrir Vísinda- og tæknisafnið í Osló í samvinnu við fyrirtækið CoDesign. Sýningin tvinnar saman sögur sem tengjast olíuiðnaðinum, allt frá uppruna olíu og gass fyrir miljónum ára til dagsins í dag. Nánari upplýsingar um verkefnið er að finna hér.
Þá hlaut Gagarínsillfurverðlaun fyrir Mannréttindasafnið í Kanada. Þemu og efnistök atriðanna voru skilgreind af safninu sjálfu en sýningarhönnun var í höndum Ralph Appelbaum Associates í New York. Frá upphafi var lagt upp með að safnið yrði þekkingarsetur sem myndi móta framtíð mannréttindamála í heiminum. Miklar kröfur voru gerðar í aðgengismálum því safninu er ætlað að innleiða nýja staðla fyrir aðgengi fatlaðra á heimsvísu. Nánari upplýsingar um verkefnið hér.
European Design Awards er samstarfsverkefni fimmtán evrópskra hönnunartímarita, sem öll eru leiðandi á sínu sviði og dómnefndina skipa fulltrúar þeirra. Verðlaunin voru fyrst veitt árið 2006 og eru talin ein þau virtustu á sviði grafískrar hönnunar, myndskreytinga og stafrænnar hönnunar. Fulltrúi Gagarín tók á móti verðlaununum síðastliðna helgi á veglegri hátíð í Istanbúl í Tyrklandi.